Zv.ministrja e Mjedisit, Olijana Ifti tregon në një intervistë për “Gazeta Shqiptare”, se ndihet komode në qeverinë e re dhe vlerëson përzgjedhjet e bëra nga kryeministri Edi Rama sa u përket grave që ka përfshirë në Kabinetin e tij. Ajo thotë se detyra e re është një sfidë e re, gjithashtu, duke kujtuar se politikat mjedisore janë një çështje që po krijon çdo ditë e më tepër interes më të madh tek qytetarët.

Znj.Ifti, ju sapo keni marrë emërimin si zv. ministre e Mjedisit. A ishte ky një propozim që juve iu është bërë nga kryetari i PBDNJ-së, Vangjel Dule, pas konsultave me kryeministrin Rama, apo një propozim direkt i kryeministrit?

Së pari më lejoni të shpreh vlerësimin dhe mirënjohjen për këtë funksion që më është besuar nga kryeministri. Prania ime në qeveri është rezultat i bashkëpunimit të partisë ku aderoj prej vitesh, PBDNJ-së, me “Aleancën për Shqipërinë Europiane”.

Mjedisi në Shqipëri dihet që ka shumë problematika. A keni ju një listë zgjidhjesh për këtë çështje?

Jam e sigurt dhe besimplotë në realizimin me profesionalizëm të angazhimeve të qeverisë për të garantuar një mjedis të shëndetshëm në hartimin dhe zbatimin e ligjeve dhe standardeve mjedisore. Miradministrimi i mjedisit, pyjeve dhe ujërave ka impakt të drejtpërdrejtë në përmirësimin e cilësisë së jetesës së qytetarëve dhe integrimin e Shqipërisë në Bashkimin Europian, ky është misioni dhe vizioni im. Po ashtu i rëndësishëm është edhe vlerësimi i performancës në lidhje me arritjen e objektivave kryesorë, 16 prioriteteve të ministrisë në 100 ditët e para të qeverisjes, si edhe impakti aktual i aktiviteteve për mbrojtjen e natyrës dhe sensibilizimin e opinionit publik, duke i krahasuar ato me ndikimin e parashikuar.

Ju më parë keni qenë pjesë e Ministrisë së Punës dhe Çështjeve Sociale. Si e vlerësoni këtë eksperiencë të re?

Krahas eksperiencës në MPCSSHB, kam pasur fatin të kem eksperienca në shumë sektorë të tjerë. Veçoj këtu angazhimin e parë politik, zgjedhja si anëtare e Këshillit të minibashkisë nr.7, në zgjedhjet e pushtetit vendor të vitit 2007; në Bashkinë e Tiranës deri në vitin 2011, dhe së fundi pranë Kontrollit të Lartë të Shtetit. Si audituese performance në vitin e fundit, kam kuptuar se matja e performancës ka një rëndësi të veçantë; ka të bëjë me vlerësimin dhe përgjegjshmërinë publike, e cila nënkupton faktin që, individët që janë përgjegjës për zbatimin e programeve qeveritare ose drejtimin e ministrive, kanë përgjegjësinë për menaxhimin e tyre me efektivitet dhe efiçencë, çka qëndron në themel të punës sime të përditshme. Një periudhë kam drejtuar Sekretariatin e Marrëdhënieve me Jashtë dhe Mediat, në PBDNJ. Ishte një eksperiencë e bukur dhe interesante! Detyra e re është një sfidë e re! Nuk duhet të harrojmë në asnjë moment se politikat ambientaliste kanë një sensibilitet në rritje te qytetarët.

Prania e femrave në kabinetin e ri “Rama” është – në ndryshim nga qeveritë e mëparshme – më i madh. A ndiheni ju komode, në një qeveri me kaq prani femërore?

Natyrisht, nuk mund të ndodhë ndryshe, duke shtuar këtu dhe profesionalizmin, besimin dhe reagimin pozitiv të opinionit publik për zgjedhjet e bëra nga kryeministri.