FRANCE- Është zhvilluar më 26 tetor, në Corse të Francës Konferenca Botërore për Mbrojtjen e Oqeaneve, me pjesëmarrjen në nivele të larta politike ministrore.

Zyra e ministrisë së Mjedisit, njoftoi se në këtë konferencë ishte e pranishme edhe zv/ministrja e Mjedisit Olijana IFTI ku shprehu angazhimin dhe pjesëmarrjen e vendit tonë për të qenë pjesë në rrjetin botëror të Mbrojtjes së Deteve dhe Oqeaneve.

“Zhvillimet, konkluzionet dhe dokumentat që u adaptuan në konferencë do të jenë një bazë shumë e rëndësishme në vizionin dhe projektet që qeveria shqiptare do të ndërmarrë për zonat e mbrojtura detare dhe bregdetare”, – njoftoi zyra për shtyp.

Gjatë konferencës Zv/Ministrja IFTI zhvilloi një takim me Ministrin e Ekologjisë, Zhvillimit të Qëndrueshëm dhe Energjisë të Francës, Philip Martin. Në këtë takim ministri francez, Martin, iu përgjigj kërkesës së Zv/Ministres IFTI, për institucionalizimin e marrëdhënieve midis ministrive të dy vendeve.

Gjithashtu, njoftohet se së shpejti do të organizohet një takim dypalësh në Paris ku do të vendosen dhe urat e bashkëpunimit, forcimi i kapaciteteve, konsulenca dhe ekspertiza në fushën e mjedisit në përgjithësi dhe në atë të menaxhimit të ujrave në veçanti.