Kryetari PBDNJ-së Vangjel Dule intervistë për Ilva Now në Euronews Albania. – Nuk do të lejojmë që banorëve të bregut të Jonit t’u grabitet prona – Marrëveshja zgjedhore nuk prek problematikat e procesit, bën vetëm arnime – Marrëveshja e detit Greqi-Shqipëri u rrëzua nga raporti sekret i Turqisë 

- Nuk do të lejojmë që banorëve të bregut të Jonit t’u grabitet prona

Në një intervistë për Ilva Now në Euronews Albania, Kryetari i Partisë Bashkimi për të Drejtat e Njeriut, Vangjel Dule risolli në vëmendje çështjen e pronave dhe marrëveshjes së munguar për kufirin detar mes Shqipërisë dhe Greqisë.

Dule tha se çështja e pronave do të diktojë shumë vazhdimësinë e bisedimeve për anëtarësim në Bashkimin Evropian, por përjashtoi cilësimet e një qëndrimi “veto” nga Athina kundër Tiranës.

“Athina ka shqetësimin se pjesëtarë të komunitetit minoritar etnik grek në Shqipëri, kryesisht ata të bregut të Jonit, janë objekt bastisjesh dhe grabitjesh të pronës së tyre stërgjyshore të trashëguar, përmes trukesh ligjore të njëpasnjëshme, kemi industri ligjesh dhe vendimesh të qeverisë që nuk kanë objekt tjetër veçse të grabisin pronën,” – tha Dule i cili pretendoi se këto pretendime janë të faktuara, por nuk dha detaje nëse qeveria greke i ka adresuar Shqipërisë problemin në fjalë duke ironizuar se “ai nuk është korrieri” mes Tiranës dhe Athinës.

“Ne nuk do të lëmë, për aq sa kemi mundësi politike, që banorëve të Bregut të Jonit, t’u grabitet prona me forma dhe metoda të aplikuara deri më sot. Me konferencën ndërqeveritare, tani fillon thjesht muhabeti i vërtetë i politikës sonë rreth çështjes së pronave,” – shtoi Dule.

I pyetur nëse situata aktuale e ka vënë përballë kushteve që Shqipëria të rrezikojë një veto të Greqisë për integrimin, Dule e mohoi këtë, por nënkuptoi se nëse çështja e pronave nuk zgjidhet, bisedimet mund të ngecin për shkak të metodologjisë së re.

“Me metodologjinë e re të zhvillimit të bisedimeve për anëtarësim, është në formën e shkallëve, nëse nuk ngjit të parën, nuk mund të shkosh te e dyta. Shkallët kalohen, nuk kapërcehen në procesin e integrimit, nuk ka nevojë për veto prej askujt,” – tha Dule, i cili pretendoi se prej 30 vitesh në politikë nuk kishte dëgjuar ndonjëherë nga ndërkombëtarët për “veto” nga Greqia për Shqipërinë.

Për sa i përket marrëveshjes së detit mes dy vendeve, kryetari i PBDNJ-së tha se nuk kishte dijeni për riaktivizimet e fundit mes dy qeverive, por solli në vëmendje zhvillimet e fundit ku Greqia arriti një marrëveshje me Italinë.

“Ky rast nxori kakofoninë dhe blofin e qeverisë Rama në lidhje me marrëveshjen e detit me Greqinë, se sa e gabuar ka qenë lëvizja dhe se sa ide të gabuara nxori në pah qeveria, se kinse Greqia kërkon t’i grabisë ujërat Shqipërisë,” – tha Dule teksa pretendoi se marrëveshja e ujërave Greqi-Itali u arrit me të njëjtat kushte dhe parametra të gjeometrisë që u kërkua dhe me Shqipërinë në vitin 2009.

Dule përmendi opinionin e shprehur së fundmi nga një ish-ushtaraku turk, i cili thoshte se pas marrëveshjes së vitit 2009, Turqia i kishte dërguar palës shqiptare një raport sekret, në të cilin artikulohej se marrëveshja ishte në dëm të palës shqiptare.

“Kemi një ndryshim, Shqipëria, Italia, Greqia, janë palë të marrëveshjes së UNCLOS të vitit 1982, ndërsa Turqia jo. Unë e kam denoncuar që atëherë, se ndërhyrja që u bë kundër marrëveshjes dhe vendimi i Gjykatës Kushtetuese, ishte produkt i palëve të treta,” – u shpreh Dule duke nënkuptuar se ndërhyrja ishte e Turqisë dhe se Shqipëria nuk pa interesat e saj, por interesat e Turqisë.

Dule pretendoi se Turqia në raportet me Greqinë ka shkelur ligjet ndërkombëtare për sa i përket çështjes së ujërave. Ai vuri në diskutim qëndrimin që duhet të mbajë Shqipëria, nëse duhet të ndjekë ligjet ndërkombëtare, apo “ligjet kaçake”.

Dakordësia për kufirin detar do t’i hapte rrugë Shqipërisë dhe Greqisë të nënshkruante kontrata për shfrytëzimin e zonave për kërkime dhe nxjerrje të mundshme të naftës apo nënprodukteve të saj.

- Marrëveshja zgjedhore nuk prek problematikat e procesit, bën vetëm arnime

Kryetari i Partisë Bashkimi për të Drejtat e Njeriut, Vangjel Dule, i cilësoi ndryshimet në kodin zgjedhor si arnime dhe jo reformë.

Gjatë një interviste për Ilva Now në Euronews Albania, Dule tha se rrënja e problemit të zgjedhjeve ka qenë gjithmonë administrimi i tyre, por që sipas tij, propozimi për administrim jopolitik përmes individëve apo administratës publike, aktualisht nuk mund të arrihet, pasi në dy vitet e fundit proceset zgjedhore kanë qenë me shembuj shumë negativë.

“Hapi për identifikimin biometrik është i rëndësishëm, por që kurrësesi nuk e zgjidh problemin, zemra e problemit, krahas administrimit është shitblerja e votës, për së cilën nuk flitet nga askush,” – tha Dule teksa e cilësoi marrëveshjen e 5 qershorit si marrëveshje që nuk prek aspektet më të domosdoshme dhe kryen vetëm arrnime të kodit zgjedhor.

Dule e cilësoi opozitën më të përgjegjshme se mazhoranca, pasi sipas tij po angazhohet seriozisht të shpëtojë zgjedhjet e ardhshme.

“Procesi i ardhshëm zgjedhor është në rrezik. Në mazhorancë ka një mentalitet kleptokratik, edhe atëherë kur e kanë të sigurt fitoren,” – tha Dule duke marrë si shembull zgjedhjet e parakohshme në Bashkinë Korçë në vitin 2013, ku me kalimin e Niko Peleshit zëvendëskryeministër, u zhvilluan sërish zgjedhje.

“Edhe pse ishim koalicion i fortë, sapo kishim marrë qeverisjen e vendit, sërish pamë se ai i mallkuari tjetërsim i votës doli në pah,” – tha Dule, partia e së cilit asokohe ishte në koalicion me Partinë Socialiste.

Më tej në diskutim, Dule tha se ndryshimi i sistemit kërkonte një debat më të gjerë, se heqja e koalicioneve parazgjedhore “çon ujë te burimi, Partia Socialiste,” hapja e listave nuk është me aq rëndësi sa trumbetohet.

Ai tha se thelbi se zgjedhësi do të ketë më shumë mundësi nuk qëndron, pasi sërish rreshtimi në listën zgjedhore do të vendoset nga kryetari.

Pragu prej 5 për qind, i kërkuar nga opozita parlamentajre, u kundërshtua nga Dule, sipas së cilit me një prag më të lartë sigurohen “superpushtete” dhe jo “fragmentarizime të pushtetit”, që sipas tij i nevojitet demokracisë shqiptare.

- Marrëveshja e detit Greqi-Shqipëri u rrëzua nga raporti sekret i Turqisë