Deklaratë për shtyp

Partia Bashkimi për të Drejtat e Njeriut zhvillon prej kohesh një cikël takimesh me shoqata përfaqësuese dhe grupe interesi me lidhje me kuadrin ligjor për trajtimin e çështjes së pronave në përgjithësi dhe ligjin “Për përfundimin e proceseve kalimtare të pronësisë në Republikën e Shqipërisë” në veçanti.

Konstatojmë me keqardhje se qeveria, në shkelje të hapur të çdo parimi transparence, po përgatitet të kalojë në procedurë parlamentare projektligjin në fjalë,

1: Pa e konsultuar me grupet e interesit dhe pa zhvilluar asnjë debat publik

2: Duke anashkaluar apo duke marrë parasysh në mënyre selektive rekomandimet e Komisionit të Venecias

3: Duke vënë para faktit të kryer me dhjetëra mijëra qytetarë dhe komunitete të cilat humbasin përfundimisht pronat e tyre, por edhe të drejtën ligjore të pretendimit të saj.

Qeveria e Zotit Rama synon që, duke injoruar pushtetin vendor por edhe sistemin e drejtësisë ta shndërrojë trajtimin e pronës në një domein ekskluziv të tij dhe të strukturave drejtpërsëdrejti të varura juridikisht dhe verbërisht, besnike politikisht.

Në mënyrë të veçantë, nëpërmjet këtij  ligji, Rama i hap rrugën përmbushjes së objektivit të tij strategjik për tjetërsimin e statusit pronësor, kryesisht në bregdet, por edhe në të gjithë vendin, duke u privuar pronën pronarëve të ligjshëm dhe duke i venë atë në shërbim të interesave të oligarkëve –  klientë të pushtetit të tij personal.

Kjo nisme ligjore, në korrelacion me ligjin  për Investitorët Strategjikë, për Korporatën e investimeve dhe VKM për Shpronësimet, përben gurin e varrit për pronën dhe pronësinë e ligjshme.